У судзе Маскоўскага раёна Брэста 17 сакавіка абвешчана рашэнне па крымінальнай справе ў дачыненні да мясцовага актывіста і блогера Дзмітрыя Гарбунова. Суддзя Марыя Аліферук прызнала яго вінаватым паводле двух крымінальных артыкулаў за абразу прадстаўнікоў улады і прыгаварыла да зняволення.
Дзмітрыя Гарбунова затрымалі амаль два месяцы таму і ўвесь гэты час да суда ўтрымлівалі ў следчым ізалятары Брэста. Да пачатку судовага працэсу не было вядома, што сталася прычынай змяшчэння пад варту. Як высветлілася, блогера абвінавацілі паводле ч.1 арт.368 Крымінальнага кодэкса («Абраза прэзідэнта Рэспублікі Беларусь») і артыкула 369 КК («Абраза прадстаўніка ўлады»).
Абвіначанне тычылася паведамленняў, якія Дзмітрый Гарбуноў зрабіў два гады таму ў сацыяльных сетках.
Так, паводле следства, у чэрвені 2021 года ён пакінуў каментар пад фотаздымкам міліцыянта з Ліды Антона Кацілы, якога лічаць датычным да затрымання грамадскага актывіста з Вітольда Ашурка (пазней ён памёр у калоніі пры невысветленых абставінах). А ў жніўні 2021 года нібыта зрабіў яшчэ адзін абразлівы допіс ў інтэрнэце, які тычыўся Аляксандра Лукашэнкі.
У выніку разгляду справы суддзя Марыя Аліферук прызнала Дзмітрыя Гарбунова вінаватым і пакарала пазбаўленнем волі на паўтара года ў калоніі агульнага рэжыму.
Акрамя таго, суддзя задаволіла пазоў аб маральнай кампенсацыі на карысць міліцыянта Антона Кацілы. Яму Дзмітрый Гарбуноў мусіць сплаціць 2000 рублёў.
Чытайце яшчэ:
Палітзняволены Ігар Лосік здзейсніў спробу суіцыду ў калоніі
Сярэдзіч прапанаваў замірэнне. Ці прыме рэжым прапанову?
Два наступныя нумары слуцкай газеты «Інфа-Кур’ер» не выйдуць